ઉત્તર પ્રદેશના શ્રાવસ્તીમાં એક ભયાનક માર્ગ અકસ્માત સર્જાયો છે. નેશનલ હાઈવે પર ટેમ્પો અને કાર વચ્ચે જોરદાર ટક્કર થઈ હતી. આ અકસ્માતમાં પાંચ લોકોના મોત થયા હતા અને અન્ય ઘાયલ થયા હતા. અકસ્માતની માહિતી મળતા જ પોલીસ ઘટનાસ્થળે પહોંચી ગઈ હતી અને ઘાયલોને હોસ્પિટલમાં દાખલ કર્યા હતા. એક અધિકારીએ જણાવ્યું કે મૃતદેહોને પોસ્ટમોર્ટમ માટે મોકલી દેવામાં આવ્યા છે.
આ અકસ્માત શનિવારે નેશનલ હાઈવે 130 પર ઈકૌના પાસે થયો હતો. જણાવવામાં આવી રહ્યું છે કે બંને વાહનો વચ્ચેની ટક્કર એટલી જોરદાર હતી કે ત્રણ લોકોના ઘટનાસ્થળે જ મોત થયા હતા અને બે લોકોના હોસ્પિટલમાં મોત થયા હતા. અકસ્માત બાદ બંને વાહનો રોડની બાજુના ખાડામાં પડી ગયા હતા. અકસ્માત બાદ હાઇવે પર અફરાતફરીનો માહોલ સર્જાયો હતો.
અકસ્માતમાં ટેમ્પોનો કચ્ચરઘાણ થયો
આ અકસ્માતમાં ટેમ્પોને સંપૂર્ણ નુકસાન થયું છે. કારના આગળના ભાગને સૌથી વધુ નુકસાન થયું છે. માહિતી મળતાં જ પોલીસ ઘટનાસ્થળે પહોંચી હતી અને કારમાંથી મૃતદેહોને બહાર કાઢીને પોસ્ટમોર્ટમ માટે મોકલી આપ્યા હતા. અકસ્માતને લઈને થોડીવાર માટે હાઈવે પર લોકોના ટોળેટોળા ઉમટી પડ્યા હતા. લગભગ જામ જેવી સ્થિતિ સર્જાઈ હતી. જો કે પોલીસના આગમન બાદ લોકોને ઘટના સ્થળેથી ખસેડવામાં આવ્યા હતા.
એક પોલીસ અધિકારીએ જણાવ્યું હતું કે પ્રાથમિક દૃષ્ટિએ અકસ્માતનું મુખ્ય કારણ બંને વાહનોની વધુ ઝડપ હતી. જો કે, અધિકારીએ એ પણ સ્વીકાર્યું કે વાહનોમાં કોઈ ટેકનિકલ ખામી હોઈ શકે છે. મૃતકોના પરિવારજનોને માહિતી મોકલી દેવામાં આવી છે. બંને વાહનોના વાહન માલિકોની શોધખોળ કરવામાં આવી રહી છે.