Delhiમાં ગાઢ ધુમ્મસ, UPમાં કડકડતી ઠંડી, IMDએ હવામાનને લઇ કરી આગાહી

ઉત્તર ભારતના ઘણા રાજ્યોમાં લઘુત્તમ તાપમાનમાં ઝડપી ઘટાડો થયો છે. હવામાન વિભાગના જણાવ્યા અનુસાર દેશના ઉત્તરીય રાજ્યોમાં ઠંડીએ દસ્તક આપી છે. આગામી પાંચ દિવસમાં ઉત્તર-પશ્ચિમના લઘુત્તમ તાપમાનમાં બેથી ત્રણ ડિગ્રી સેલ્સિયસનો ઘટાડો જોવા મળી શકે છે. આ ઉપરાંત ઉત્તર-પશ્ચિમ, ઉપ-હિમાલય, બિહાર અને પશ્ચિમ બંગાળમાં આગામી બે દિવસ સુધી ધુમ્મસની સ્થિતિ યથાવત રહેવાની શક્યતા છે.

દિલ્હી-એનસીઆરમાં ધુમ્મસની ચાદર છવાયેલી છે. હવામાન વિભાગના જણાવ્યા અનુસાર દિલ્હીમાં સ્મોગનું કારણ પ્રદૂષણ અને ઠંડી બંને છે. દેશની રાજધાનીમાં ઠંડીની શરૂઆત થઈ ગઈ છે અને આગામી દિવસોમાં દિલ્હીનું તાપમાન ઝડપથી ઘટશે. આ સમગ્ર સપ્તાહમાં દિલ્હીમાં ગાઢ ધુમ્મસ રહેશે. IMD અનુસાર, આ સમગ્ર સપ્તાહમાં દિલ્હીનું મહત્તમ તાપમાન 25થી 28 ડિગ્રી સેલ્સિયસની વચ્ચે રહેવાની શક્યતા છે અને લઘુત્તમ તાપમાન 13થી 16 ડિગ્રી સેલ્સિયસની આસપાસ રહેવાની શક્યતા છે.

હવામાનની આગાહી કરતી એજન્સી સ્કાયમેટ અનુસાર, આગામી 24 કલાકમાં પંજાબ, હરિયાણા, દિલ્હી, ઉત્તર રાજસ્થાન, ઉત્તર પ્રદેશ અને બિહારના ભાગોમાં ગાઢ ધુમ્મસ છવાઈ શકે છે. આ રાજ્યોમાં દિવસના તાપમાનમાં વધુ ઘટાડો થવાની સંભાવના છે. ઉત્તર-પશ્ચિમ અને મધ્ય ભારતમાં લઘુત્તમ તાપમાનમાં થોડો ઘટાડો થશે.

તમિલનાડુમાં કેટલાક સ્થળોએ ભારે વરસાદની સાથે હળવાથી મધ્યમ વરસાદ થઈ શકે છે. આંતરિક તમિલનાડુ, કેરળ, લક્ષદ્વીપ અને આંદામાન અને નિકોબાર ટાપુઓમાં હળવાથી મધ્યમ વરસાદની શક્યતા છે. આ સિવાય દક્ષિણ તટીય આંધ્રપ્રદેશ, રાયલસીમા અને દક્ષિણ આંતરિક કર્ણાટકમાં હળવો વરસાદ પડી શકે છે. દિલ્હી અને એનસીઆરનો હવા ગુણવત્તા સૂચકાંક ખૂબ જ ખરાબથી ગંભીર શ્રેણીમાં રહેશે.

દેશની મોસમી પ્રવૃત્તિઓ

હવામાનની આગાહી કરતી એજન્સી સ્કાયમેટ અનુસાર, માલદીવ ક્ષેત્ર અને તેની નજીકના વિષુવવૃત્તીય હિંદ મહાસાગર પર ચક્રવાતનું પરિભ્રમણ રચાયું છે. આ ચક્રવાતી પરિભ્રમણમાંથી એક ચાટ દક્ષિણ-પૂર્વ અરબી સમુદ્ર સુધી વિસ્તરે છે. આ સિવાય દક્ષિણ બાંગ્લાદેશ અને આસપાસના વિસ્તારોમાં વધુ એક સાયક્લોનિક સરક્યુલેશન સક્રિય છે. ઉત્તર ભારતમાં 12.6 કિમીની ઊંચાઈએ 100 નોટની ઝડપે જેટ સ્ટ્રીમ પવન ફૂંકાઈ રહ્યો છે.