ભારતીય ક્રિકેટમાં 6 ડિસેમ્બરની તારીખ ખૂબ જ ખાસ છે. ટીમ ઈન્ડિયાના પાંચ સ્ટાર ખેલાડીઓ એક જ દિવસે સેલિબ્રેશન કરે છે. જસપ્રીત બુમરાહ, શ્રેયસ અય્યર, રવિન્દ્ર જાડેજા, કરુણ નાયર અને આરપી સિંહ આ તારીખે એકસાથે તેમના જન્મદિવસનું સેલિબ્રેશન કરે છે.
આ વખતે બુમરાહની બર્થડે બેશ ઓસ્ટ્રેલિયાની ધરતી પર યોજાશે અને સર જાડેજા તેની સાથે રહેશે. કાંગારૂની જમીન પર પાર્ટી થશે. તાજેતરમાં 26.75 કરોડ રૂપિયા મળતા ઐયરના ઘરે ડબલ સેલિબ્રેશનની તૈયારીઓ પણ થશે. ટેસ્ટ ક્રિકેટમાં ત્રેવડી સદી ફટકારવાનો રેકોર્ડ બનાવનાર કરુણ નાયર પણ આ દિવસે પોતાનો જન્મદિવસ ઉજવે છે.
ઓસ્ટ્રેલિયામાં બુમરાહ-જડ્ડુનું સેલિબ્રેશન
પર્થ ખાતે બોર્ડર-ગાવસ્કર સિરીઝમાં ટીમ ઈન્ડિયાને જીત અપાવનાર જસપ્રિત બુમરાહનો જન્મ 6 ડિસેમ્બરે થયો હતો. બૂમ-બૂમ બુમરાહ આ વખતે પોતાનો જન્મદિવસ કાંગારૂની ધરતી પર ઉજવશે. બુમરાહની સાથે રવિન્દ્ર જાડેજા પણ આ સેલિબ્રેશનમાં ભાગ લેશે અને તેનો 36મો જન્મદિવસ ઉજવતો જોવા મળશે. પ્રથમ ટેસ્ટમાં બુમરાહનું પ્રદર્શન શાનદાર રહ્યું હતું. બુમરાહે તેની કેપ્ટનશીપ હેઠળ ટીમ ઈન્ડિયાને ઓસ્ટ્રેલિયા સામે 295 રનની મોટી જીત અપાવી હતી. આ સાથે જ જાડેજાને પ્રથમ ટેસ્ટમાં પ્લેઈંગ ઈલેવનમાં તક મળી ન હતી તેથી તે પોતાના જન્મદિવસે એડિલેડ ટેસ્ટમાં રમવા માટે એક્સાઈટેડ રહેશે.
અય્યર કરશે સેલિબ્રેશન
IPL 2025ની મેગા ઓક્શનમાં 26.75 કરોડ રૂપિયા મેળવનાર શ્રેયસ અય્યરનો જન્મદિવસ પણ 6 ડિસેમ્બરે આવે છે. અય્યર પર આ વખતે ઘણા પૈસાનો વરસાદ થયો છે, તેથી ચોક્કસપણે આ જન્મદિવસ તેના માટે ખાસ બનવાનો છે. સૈયદ મુશ્તાક અલી ટૂર્નામેન્ટમાં પણ અય્યર બેટથી ઘણો ધૂમ મચાવી રહ્યો છે અને ટીમ ઈન્ડિયામાં વાપસી કરવા માટે તૈયાર છે. અય્યરને આ વખતે મેગા ઓક્શનમાં પંજાબ કિંગ્સે ખરીદ્યો છે. શ્રેયસ તેનો 30મો જન્મદિવસ ઉજવશે.
આરપી સિંહ-કરુણ નાયરનો પણ જન્મદિવસ
ટીમ ઈન્ડિયાના પૂર્વ ફાસ્ટ બોલર આરપી સિંહનો જન્મદિવસ પણ 6 ડિસેમ્બરે આવે છે. આરપીએ 2007માં રમાયેલા ટી-20 વર્લ્ડ કપમાં બોલથી મહત્વની ભૂમિકા ભજવી હતી. તેણે સાઉથ આફ્રિકા સામે કિલર સ્પેલ બોલ કરીને ટીમ ઈન્ડિયાને સેમીફાઈનલની ટિકિટ મેળવી હતી. ટેસ્ટ ક્રિકેટમાં ત્રેવડી સદી ફટકારીને ગુમનામ થયેલો કરુણ નાયરનો જન્મ પણ 6 ડિસેમ્બરે થયો હતો. આ વખતે દિલ્હી કેપિટલ્સે મેગા ઓક્શનમાં કરુણને પોતાની ટીમમાં સામેલ કર્યો છે.