બોર્નમાઉથ ઇંગ્લિશ પ્રીમિયર લીગ ફૂટબોલના મુકાબલામાં મેજર અપસેટ સર્જીને ડિફેન્ડિંગ ચેમ્પિયન માન્ચેસ્ટર સિટીને 2-1થી પરાજય આપ્યો હતો. બોર્નમાઉથે કોઇ પણ ટૂર્નામેન્ટમાં સિટી સામે પ્રથમ વિજય હાંસલ કર્યો છે. આ પહેલાં બોર્નમાઉથે સિટી સામે 21 મેચ રમી હતી અને આ દરમિયાન 19 મુકાબલા હાર્યા હતા અને માત્ર બે મેચ ડ્રો કરવામાં સફળતા મેળવી હતી.
બીજી તરફ સિટીના અજેય રહેવાની પરંપરા તૂટી ગઇ હતી. તેને ટૂર્નામેન્ટમાં 32 મેચ બાદ પ્રથમ પરાજય મળ્યો છે. બોર્નમાઉથ માટે એન્ટોની સેમેન્યોએ નવમી મિનિટે ગોલ કર્યો હતો. ઇવાનિલ્સે 64મી મિનિટે ગોલ કરીને ટીમને 2-0થી આગળ કરી દીધી હતી. 82મી મિનિટે જોસ્કો ગ્વાર્ડિલે સિટી માટે ગોલ કરીને પરાજયનું અંતર ઓછું કર્યું હતું. લીગમાં માન્ચેસ્ટર યુનાઇટેડ અને ચેલ્સીની મેચ 1-1થી ડ્રો રહી હતી. ફુલહામ એફસીએ બ્રેન્ટફોર્ડને 2-1થી પરાજય આપ્યો હતો. ટોટનહામે એસ્ટન વિલાને 4-1થી હરાવ્યું હતું. વુલ્વસ અને ક્રિસ્ટલ પેલેસની મેચ 2-2થી ડ્રો રહી હતી. લિવરપૂલે બ્રાઇટનને 2-1થી તથા ન્યૂ કાસલે આર્સનલને 1-0થી હરાવ્યું હતું.