કર્ણાટકની રાજધાની બેંગલુરુમાં એક મહિલાનો મૃતદેહ તેના ઘરના ફ્રીજમાંથી મળી આવ્યો છે. પોલીસને 30 ટુકડાઓમાં લાશ મળી હતી જે સંપૂર્ણ રીતે સડી ગઈ હતી. પોલીસે આશંકા વ્યક્ત કરી છે કે મહિલાની હત્યા કરવામાં આવી હતી, તેના શરીરના ટુકડા કરી ફ્રિજમાં ભરી દેવામાં આવ્યા હતા. પોલીસના જણાવ્યા અનુસાર મહિલાની 4-5 દિવસ પહેલા હત્યા કરવામાં આવી હતી.
કર્ણાટકની રાજધાની બેંગલુરુમાં એક મહિલાની વિકૃત મૃતદેહ તેના ઘરમાંથી મળી આવતા વિસ્તારમાં સનસનાટી મચી ગઈ હતી. પોલીસે શનિવારે જણાવ્યું હતું કે મલ્લેશ્વરમમાં એક ઘરમાંથી 29 વર્ષીય મહિલાનો મૃતદેહ ખૂબ જ ખરાબ હાલતમાં મળી આવ્યો હતો.
ફ્રિજમાંથી 30 ટુકડાઓમાં મહિલાની લાશ મળી
પોલીસના જણાવ્યા અનુસાર, મૃતક મહિલાની ઓળખ મહાલક્ષ્મી તરીકે કરવામાં આવી છે, જેના શરીરના 30 થી વધુ ટુકડા કરી રેફ્રિજરેટરમાં ભરી દેવામાં આવ્યા હતા. ન્યૂઝ એજન્સીના અહેવાલ મુજબ વરિષ્ઠ પોલીસ અધિકારીઓ ઘટનાસ્થળે પહોંચ્યા અને બેરિકેડ લગાવીને તે બિલ્ડિંગ તરફ જતા રસ્તાઓ બંધ કરી દીધા. મહિલાનો મૃતદેહ બેડરૂમમાંથી મળી આવ્યો હતો જ્યાં તે એકલી રહેતી હતી.
હત્યા 4-5 દિવસ પહેલા થઈ હતીઃ પોલીસ
પોલીસને આશંકા છે કે આ હત્યાની ઘટના છે, જે લગભગ એક અઠવાડિયા પહેલા બની હતી. આ મામલે તપાસ શરૂ કરવામાં આવી છે. એડિશનલ પોલીસ કમિશનર (વેસ્ટ ઝોન) એન સતીશ કુમારે જણાવ્યું હતું કે, ‘મહિલાના મૃતદેહના ટુકડા કરી વ્યાલીકાવલ પોલીસ સ્ટેશન વિસ્તારના એક ઘરમાં રેફ્રિજરેટરમાં રાખવામાં આવ્યા હતા. તેમણે કહ્યું કે એવું લાગે છે કે હત્યા 4-5 દિવસ પહેલા કરવામાં આવી છે.
તેમણે કહ્યું કે ડોગ સ્ક્વોડ અને ફોરેન્સિક નિષ્ણાતોએ પણ સ્થળની મુલાકાત લીધી હતી અને તપાસ શરૂ કરી હતી. અધિકારીએ કહ્યું, ‘મૃતદેહની ઓળખ કરી લેવામાં આવી છે અને તપાસ ચાલી રહી છે.’ રિપોર્ટ અનુસાર, મહિલા મૂળ અન્ય રાજ્યની હતી પરંતુ કર્ણાટકમાં સ્થાયી થઈ હતી. પોલીસને માહિતી મળી છે કે મહિલા તેના પતિથી અલગ રહેતી હતી.
રિપોર્ટ અનુસાર, મહાલક્ષ્મી મલ્લેશ્વરમમાં રહેતી હતી અને એક મોલમાં કામ કરતી હતી, તેનો પતિ શહેરથી દૂર એક આશ્રમમાં કામ કરતો હતો. ઘટનાની માહિતી મળતા તેઓ પણ ઘટના સ્થળે પહોંચી ગયા હતા.
2022માં શ્રદ્ધાની હત્યા કરવામાં આવી હતી
તમને જણાવી દઈએ કે બે વર્ષ પહેલા દિલ્હીમાં પણ આવો જ એક કિસ્સો સામે આવ્યો હતો. 18 મે, 2022 ના રોજ, દિલ્હીના મહેરૌલીમાં શ્રદ્ધા નામની છોકરીની તેના લિવ-ઇન પાર્ટનર આફતાબ પૂનાવાલાએ નિર્દયતાથી હત્યા કરી હતી. શ્રદ્ધાના શરીરના 35 ટુકડા કરી રેફ્રિજરેટરમાં રાખવામાં આવ્યા હતા.