બાંગ્લાદેશમાં સત્તા પરિવર્તન બાદ હવે હિંદુ સમુદાય વિરુદ્ધ ચાલી રહેલી હિંસા અટકવાનું નામ લઈ રહી નથી. દેશના કોઈને કોઈ ખૂણેથી તેમની વિરુદ્ધ હિંસાના સમાચાર સામે આવતા રહે છે. આજે બાંગ્લાદેશના દક્ષિણ-પૂર્વીય બંદર શહેર ચિત્તાગોંગમાંથી હિંસાના સમાચાર સામે આવ્યા હતા, જ્યાં ઈસ્કોન મંદિર પર ટિપ્પણીઓ પછી હિંસાની ઘટના બની હતી.
સેનાએ શહેરના કેટલાક વિસ્તારોમાં પેટ્રોલિંગ કર્યું
હિંસા રોકવા માટે સેનાના નેતૃત્વમાં સંયુક્ત દળોએ બુધવારે શહેરના કેટલાક વિસ્તારોમાં પેટ્રોલિંગ કર્યું હતું, સેનાના આગમન બાદ શહેરમાં તણાવપૂર્ણ શાંતિ છે. મળતી માહિતી અનુસાર એક મુસ્લિમ દુકાનદારે તેના સોશિયલ મીડિયા પર ઈસ્કોન વિરુદ્ધ વાંધાજનક ટિપ્પણી કર્યા બાદ હિંસા ફાટી નીકળી હતી, જેમાં ઘણા લોકો ઘાયલ થયા હતા.
હિન્દુ સમુદાયે રોષ વ્યક્ત કર્યો
અધિકારીઓ અને પ્રત્યક્ષદર્શીઓએ જણાવ્યું હતું કે બિઝનેસમેન ઉસ્માન અલીએ ફેસબુક પર ઈસ્કોનને આતંકવાદી જૂથ ગણાવ્યું હતું અને ત્યારબાદ આ વિસ્તારમાં તણાવ સર્જાયો હતો અને હજારી ગલી વિસ્તારમાં રહેતા હિન્દુ સમુદાયે તેની સામે રોષ વ્યક્ત કર્યો હતો. હજારી ગલીમાં રહેતા લોકો મુખ્યત્વે હિંદુ સમુદાયના છે, જેઓ જ્વેલરીની દુકાનો અને દવાનો જથ્થાબંધ વેપાર કરે છે.
આખી રાત હિંસા ચાલુ રહી
શહેરના લોકોએ જણાવ્યું હતું કે ઈસ્કોન પર કરવામાં આવેલી આ ટિપ્પણીને લઈને આખી રાત અથડામણ ચાલુ રહી હતી. આ દરમિયાન સેના, બાંગ્લાદેશના અર્ધલશ્કરી દળો અને ઘટનાસ્થળે પહોંચેલા પોલીસકર્મીઓ દ્વારા કરવામાં આવેલા લાઠીચાર્જને કારણે ઘણા લોકો ઘાયલ થયા હતા. આ સમયગાળા દરમિયાન હજારી ગલી વિસ્તારમાં દુકાનો અને વેપારી સંસ્થાઓ બંધ રહી હતી. અહીં સેનાના જવાનો પોલીસની સાથે જીપમાં પેટ્રોલિંગ કરી રહ્યા છે.
80 લોકોની અટકાયત
સંયુક્ત સુરક્ષા દળોએ 80 જેટલા શંકાસ્પદ લોકોની અટકાયત કરી લીધી છે અને કાયદાકીય કાર્યવાહી માટે સ્થાનિક ગુપ્તચર માહિતી અને સીસીટીવી ફૂટેજની તપાસ કરીને ગુનેગારોની ઓળખ કરવામાં આવી રહી છે. અન્ય એક પોલીસ અધિકારીએ જણાવ્યું કે હિંદુ સમુદાયના કેટલાક નેતાઓએ શહેરમાં કોઈ મોટી હિંસા અટકાવવા માટે સુરક્ષા દળોને સ્થળ પર આવવાની અપીલ કરી હતી.