રિઝર્વ બેન્કના ગવર્નર શક્તિકાંત દાસે બુધવારે સરકાર દ્વારા વિવિધ યોજનાઓ હેઠળ આપવામાં આવતી સબસિડી અંગે ચિંતા વ્યક્ત કરી હતી. તેમણે કહ્યું કે કેન્દ્ર અને રાજ્યો દ્વારા મૂડી ખર્ચ વધી રહ્યો છે, પરંતુ ઉચ્ચ સબસિડી ખર્ચ ચિંતાનો વિષય છે.
દાસ મુંબઈમાં આયોજિત BFSI સમિટમાં બોલતા કહ્યું કે સબસિડીનો ખર્ચ ઘણો વધારે છે અને પ્રથમ ક્વાર્ટરમાં સરકારી ખર્ચ જીડીપીને નીચે ખેંચી રહ્યો છે. સરકારી ખર્ચ વધવા લાગ્યો છે. કેન્દ્ર અને રાજ્યોની આવક અને મૂડી ખર્ચ બંને વધવા લાગ્યા છે. સબસિડી ખર્ચ એક મુદ્દો છે.તેમણે કહ્યું કે જુલાઈ-સપ્ટેમ્બર ક્વાર્ટરમાં સરકારી સબસિડી માટે ચુકવણીમાં વધારો થયો છે. સરકારે નાણાકીય વર્ષ 2024-25માં ફૂડ સબસિડી માટે રૂ. 2,05,250 કરોડનું બજેટ રાખ્યું છે. જે 2023-24ના રૂ. 2,12,332 કરોડના સુધારેલા અંદાજ કરતાં 3% ઓછું છે. સરકારે રવિ સિઝન માટે પોષક તત્વો આધારિત ખાતર સબસિડી માટે રૂ. 24,475.53 કરોડની જોગવાઈ પણ કરી છે.
ભારતીય અર્થતંત્ર એપ્રિલ-જૂન ક્વાર્ટરમાં 6.7 ટકા વધ્યું હતું, જે આરબીઆઈના 7.1 ટકાના અનુમાન કરતાં ઓછું હતું. 2024-25 ના જુલાઈ-સપ્ટેમ્બર ક્વાર્ટર માટે જીડીપી અનુમાન 29 નવેમ્બરના રોજ જાહેર કરવામાં આવશે. દાસે કહ્યું કે વધુ સબસિડી ખર્ચ જીડીપી પર અસર કરશે. જો કે, મને લાગે છે કે આર્થિક પ્રવૃત્તિ ખૂબ જ મજબૂત ચાલી રહી છે.