IPL 2025 માટે આયોજિત મેગા ઓક્શનમાં ભારતીય ખેલાડીઓ પર ઘણા પૈસાનો વરસાદ થઈ રહ્યો છે. તો બીજી તરફ ટીમો વિદેશી ખેલાડીઓમાં બહુ ઓછો રસ દાખવી રહી છે. ભારતીય ખેલાડીઓની સરખામણીમાં વિદેશી ખેલાડીઓને મેગા ઓક્શનમાં ઓછા પૈસા મળી રહ્યા છે. જોકે, હરાજી દરમિયાન બધાને આશ્ચર્ય થયું જ્યારે 2016માં સનરાઈઝર્સ હૈદરાબાદને ચેમ્પિયન બનાવનાર કેપ્ટન ડેવિડ વોર્નર અનસોલ્ડ રહ્યો. વોર્નરને ખરીદવામાં કોઈપણ ટીમે રસ દાખવ્યો ન હતો. કાંગારૂ ટીમના પૂર્વ ઓપનરે મેગા ઓક્શનમાં તેની બેઝ પ્રાઈસ 2 કરોડ રૂપિયા રાખી હતી.
વોર્નર અનસોલ્ડ રહ્યો
IPL 2025ની મેગા ઓક્શનમાં ડેવિડ વોર્નરના નામ પર કોઈ બોલી લગાવી શકાઈ નથી. વોર્નરને ખરીદવા માટે કોઈપણ ટીમે કોઈ બોલી લગાવી નથી. વોર્નર IPL 2024માં દિલ્હી કેપિટલ્સ તરફથી રમ્યો હતો. જોકે, વોર્નરનું પ્રદર્શન કંઈ ખાસ રહ્યું ન હતું અને તે 8 મેચમાં માત્ર 168 રન જ બનાવી શક્યો હતો. આખી સિઝનમાં વોર્નરના બેટમાંથી માત્ર એક જ ફિફ્ટી નીકળી હતી. આ સાથે વોર્નરે આંતરરાષ્ટ્રીય ક્રિકેટને પણ અલવિદા કહી દીધું છે. આ જ કારણ છે કે કોઈપણ ટીમે મેગા ઓક્શનમાં વોર્નરને લેવામાં રસ દાખવ્યો ન હતો. જોકે, દરેક ફ્રેન્ચાઈઝીને હરાજીના બીજા દિવસે પણ વોર્નરને ટીમમાં સામેલ કરવાની તક મળશે.
હૈદરાબાદને બનાવ્યું હતું ચેમ્પિયન
ડેવિડ વોર્નરની ગણતરી IPLના સૌથી દિગ્ગજ ખેલાડીઓમાં થાય છે. વર્ષ 2016માં વોર્નરે પોતાની કેપ્ટનશીપમાં સનરાઈઝર્સ હૈદરાબાદને ચેમ્પિયન બનાવ્યું હતું. આ સાથે વોર્નર ઈન્ડિયન પ્રીમિયર લીગના ઈતિહાસમાં સૌથી વધુ રન બનાવવાના મામલે પણ ચોથા સ્થાને છે. વોર્નરે આ લીગમાં રમાયેલી 184 મેચોમાં 6,565 રન બનાવ્યા છે. વોર્નરે IPLમાં 4 સદી અને 62 અડધી સદી ફટકારી છે. IPLમાં સૌથી વધુ ચોગ્ગા ફટકારનારા બેટ્સમેનોની યાદીમાં વોર્નર પણ ત્રીજા સ્થાને છે.